Ég heiti Heiða Rut Ingólfsdóttir og er 28 ára gömul. Ég hef búið víða en ólst upp á Reyðarfirði frá 12 ára aldri. Ég bý núna í Reykjavík með kærastanum mínum og eigum við tvo stráka. Ég útskrifaðist sem stúdent frá Verkmenntaskóla Austurlands og var svolítinn tíma að ákveða hvað ég vildi læra. Haustið 2009 byrjaði ég í grunnskólakennarafræðum en eftir 1 ár fann ég að það átti ekki við mig. Ég tók mér því hlé til haustsins 2012 þegar ég byrjaði í uppeldis- og menntunarfræði. Ég fann strax að ég átti heima í þessu námi og ég hef lært alveg ótrúlega mikið á þessum tíma.

 

Að verða foreldri er krefjandi hlutverk fyrir hvern einstakling að takast á við. Fæðing barns markar tímamót í lífi flestra og hefur í för með sér breytingar á högum foreldra. Umönnunarhlutverk feðra fór fyrst að njóta athygli um miðja 20. öld. Lengi einkenndist hlutverk feðra innan fjölskyldunnar af fyrirvinnuhlutverki þar sem ábyrgð þeirra var fyrst og fremst að sjá henni farborða og tryggja henni öruggt skjól. Fjölskylduformið var og er að hluta til enn litað af feðraveldishugmyndum, þar sem völdin voru í höndum karla. Feður komu lítið nálægt umönnun barna sinna og voru um tíma ekki álitnir nauðsynlegir fyrir þroska þeirra. Margt hefur breyst á hálfri öld og þegar litið er til baka hefur staða feðra á Íslandi og hinum vestræna heimi þróast í þá átt að feður eru nú virkari þátttakendur inni á heimilum og í uppeldi og umönnun barna. Í erindinu verður leitast við að svara eftirfarandi spurningum: Hver eru helstu uppeldishlutverk feðra í upphafi 21. aldar? Hvernig hefur hlutverk feðra þróast og breyst frá árinu 1960? Hvaða þættir hafa helst stuðlað að breytingum á hlutverki feðra?