Ég heiti Tara Lind Gísladóttir og verð 28 ára í sumar. Ég er fædd og uppalin á höfuðborgarsvæðinu. Ég útskrifaðist sem stúdent árið 2009. Áhugi minn á uppeldis- og menntunarfræði kveiknaði sumarið fyrir háskólanám þegar ég vann með börnum og ungmönnum. Félagslíf háskólans hefur alltaf heillað mig, það að kynnast nýju fólki var mikilvægt fyrir mig þar sem ég þekkti engan þegar ég hóf mitt nám. Í dag er ég formaður Padeia nemendafélags uppeldis- og menntunarfræðinema. Námið hefur mótað skoðanir mínar, viðhorf og væntingar mínar til sjálfs míns og samfélagsins.

 

Erindi ráðstefnunnar er unnið út frá lokaverkefni mínu í uppeldis- og menntunarfræði til BA-prófs. Um er að ræða rannsóknarritgerð um kynjað samfélag, náms – og starfsval.

Hvernig tengist jafnréttisumræða síðustu 30 ára fjölskyldugildum á Íslandi í byrjun 21. aldar. Hvaða íslensk fjölskyldugildi má rekja til eðlishyggju og hvaða áhrif hafa slík gildi á væntingar barna til náms og starfa?

Á Íslandi hafa jafnréttislög verið í gildi frá 1976 og nýjasta útgáfa þeirra var innleidd árið 2008. Þrátt fyrir jafnréttislögin er náms- og starfsval ungmenna enn kynbundið og vinnumarkaðurinn kynskiptur en það kemur m.a. fram í niðurstöðum Sifjar Einarsdóttur og Rounds (2007) að körlum sé beint í hefðbundin karlastörf til dæmis verkleg störf sem krefjast notkunar tækja og konum í hefðbundin kvennastörf eins og umönnun, hjúkrun og kennslu.

Í ritgerðinni er leitast við að tengja kynbundið náms- og starfsval við hugtök Bourdieu um menningarauð og habitus og viðvarandi eðlishyggju í fjölskyldugildum.

Habitus hugtakið er notað um hegðun sem hvílir á þekkingu og skilningi og felur í sér áunnar hneigðir sem meðal annars birtast í náms- og starfsvali kynjanna (Þórdís Þórðardóttir, 2012). Menningarauðshugtak Bourdieu er táknrænt og vísar til þess að einstaklingar og hópar búa yfir mismunandi auðmagni, sem þeir skipta út fyrir félagslega stöðu á vettvangi en verðgildi menningarauðs ræðst m.a. af ríkjandi gildum samfélaga (Þórdís Þórðardóttir, 2012). Eðlishyggja er eldra hugtak sem vísar meðal annars til þess að kynin séu í eðli sínu ólík vegna mismunandi meðfæddra eiginleika. Karlar eru taldir stórir og sterkir og konur mildar og tilfinninganæmar. Hugtök Bourdieu bjóða hins vegar upp á sögu- félags- og menningarlegar skýringar á kynbundnu náms- og starfsvali sem verða hafðar að leiðarljósi í ritgerðinni.

 

 

Sif Einarsdóttir og Rounds, J. (2007). Bendill, rafræn áhugakönnun: Þróun og notkun. Reykjavík: Háskólaútgáfan.

 

Þórdís Þórðardóttir (2012). Menningarlæsi, hlutverk barnaefnis í uppeldi og menntun telpna og drengja í tveimur leikskólum. [óbirt doktorsritgerð], Reykjavík: Háskóli Íslands.